Presidente de Burundi

Presidente da República de Burundi Président de la République du Burundi
Titular Évariste Ndayishimiye Dende o 18 de xuño de 2020
Duración	7 anos, renovable unha vez
Creación	28 de novembro de 1966
Primeiro titular	Michel Micombero
Sitio web	http://www.presidence.gov.bi/

O Presidente de Burundi, oficialmente Presidente da República (francés: Président de la République), é o xefe de Estado e xefe de goberno da República de Burundi. O presidente é tamén comandante en xefe da Forza de Defensa Nacional. O cargo de presidente foi estabelecido cando Michel Micombero declarou Burundi unha república o 28 de novembro de 1966.^[1] A primeira constitución en especificar os poderes e os deberes do presidente foi a constitución de 1974 adoptada en 1976.^[2] A constitución, escrita por Micombero, afirmou a posición de Micombero como o primeiro presidente de Burundi.^[3] Os poderes do presidente actualmente derivan da Constitución de 2005 aplicada por mor dos Acordos de Arusha de 2000, despois da Guerra Civil de Burundi^[2] O presidente actual é de xeito interino Pascal Nyabenda, tras a morte o 9 de xuño de 2020 do anterior presidente Pierre Nkurunziza.

O papel do presidente é representar a unidade nacional de Burundi e asegurar que as leis e as funcións do estado se crean e executan con conformidade á Constitución. O presidente goza dunha variedade de poderes segundo a constitución. O título V estabelece os poderes executivos concedidos ao presidente e o VI os poderes lexislativos. O presidente ten o poder de nomear comandantes militares, embaixadores, maxistrados, gobernadores provinciais e membros de varios consellos nacionais. O presidente tamén nomea todos os xuíces, incluíndo os do Tribunal Supremo e do Tribunal Constitucional. O presidente pode organizar o goberno e pode pedir sesións parlamentarias baixo circunstancias extraordinarias. Alén de promulgar a lexislación, o presidente ten o poder de propor e emendar leis e pode vetar leis que o parlamento é incapaz de aprobar por maioría. O presidente tamén pode emendar a constitución. Representa a Burundi en asuntos internacionais asinando e ratificando os seus tratados. É o mando único en caso de guerra, mais necesita aprobación do parlamento e o Consello Nacional de Seguridade para comezar guerras. O presidente é o único cargo que pode autorizar accións militares. É tamén o único que pode conceder condecoracións civís e militares.

O mandato presidencial é de sete anos, e un presidente pode servir dous mandatos.^[4] Con todo, Pierre Nkurunziza exerceu dende 2015 o seu terceiro mandato.^[5] O presidente era asistido por dous vicepresidentes nomeados por el, pero o referendo constitucional de Burundi de 2018 reduciu o número de vicepresidentes a un.^[6][7] O presidente recibe unha pensión despois do fin do seu servizo.^[6]

1. ↑ "Dictionary of African Historical Biography" (en inglés). p. 274. Consultado o 15 de maio de 2019. 
2. ↑ ^{2,0 2,1} Erro no código da cita: Etiqueta <ref> non válida; non se forneceu texto para as referencias de nome :3
3. ↑ "The Constitution of Burundi". Issue: A Journal of Opinion 5 (2): 24–28. Verán, 1975. JSTOR 1166783. doi:10.2307/1166783. 
4. ↑ "Burundi Voters Back Constitution Extending Presidential Term" (en inglés). 18 de maio de 2018. ISSN 0362-4331. Consultado o 15 de maio de 2019. 
5. ↑ "Burundi's president Pierre Nkurunziza wins third term in disputed election" (en inglés). 24 de xullo de 2015. Consultado o 15 de maio de 2019. 
6. ↑ ^{6,0 6,1} "Constitución de Burundi" (PDF) (en inglés). 
7. ↑ "Burundi backs new constitution extending presidential term limits" (en inglés). Consultado o 15 de maio de 2019.